“Unë jam Teuta – Mbretëresha e deteve” do të jetë një film i shkurtër historik, që merr përsipër të tregojë historinë e të vetmes mbretëreshë të Mesdheut – një luftëtare e pathyeshme që mbrojti trojet e saj edhe atëherë kur burrat nuk mundën. Filmi përqendrohet në momentet e fundit të mbretërimit të saj, në përballjen me tradhtinë që i bëhet dhe qëndresën e saj. Rrëfimi do të ndërtohet si një ndërthurje mes ëndrrës dhe zghëndrrës, si një zë i brendshëm që udhëheq heroinën në kërkimin e saj. Në këtë udhëtim shpirtëror, ajo zbulon se brenda saj bashkëjetojnë tre figura që shkrihen në një të vetme: Mbretëresha Teutë, figura historike e luftës dhe krenarisë, e vetmja grua që mbrojti dhe zgjeroi kufijtë e Ilirisë me trimëri e mençuri të pashoqe; Teuta e re, vajza e sotme që kërkon kuptimin e emrit të saj dhe trashëgiminë që mbart; si dhe gruaja shqiptare – zëri i të gjitha grave që kanë luftuar, heshtur dhe rezistuar ndër breza. Përmes këtij procesi zbulimi, Teuta e re kupton se në gjakun e saj jeton një histori e gjatë rezistence dhe dinjiteti.