DMO Albania dhe Forumi i Politikave të Integrimit po zbatojnë projektin e financuar nga Bashkimi Europian “Heritage is our Brand”. Zbatimi i projektit ka filluar në janar 2025 dhe pritet të përfundojë në janar 2027.

Projekti ka si qëllim angazhimin e brezave të rinj në ruajtjen dhe promovimin e trashëgimisë jomateriale në Shqipëri. Specifikisht, do të kontribuojë në ofrimin e modeleve inovative dhe do të rrisë ndërgjegjësimin në lidhje me ruajtjen e trashëgimisë jomateriale përmes tregimtarisë.

Janë identifikuar 20 histori të trashëgimisë tonë shpirtërore, që pritet të shërbejnë si një burim frymëzimi për t’u transpozuar në produkte të ndryshme të artit bashkëkohor, dokumentarë, animacione, instalime, ekspozita vizuale. Platforma online Albania-Heritage.com përmbledh të gjitha historitë, krijimet artistike, materiale audio dhe video, broshura dhe studime të projektit të destinuara si informacion.

Kjo thirrje për propozime synon të mbështesë zhvillimin dhe prezantimin krijues të tregimeve të trashëgimisë jomateriale përmes metodave artistike të kohës moderne. Skema e granteve të vogla do të financojë 15 nisma, që kontribuojnë në ruajtjen e trashëgimisë jomateriale përmes mbrojtjes, promovimit kulturor dhe dokumentimit.

Ftohen të marrin pjesë në këto sesione informimi individë dhe ekipe artistësh të rinj, krijues të kulturës të moshës 18-29 vjeç, profesionistë, ekspertë në fushën e kulturës përfshirë historianë, artistë, edukatorë, kuratorë, kërkues dhe menaxherë kulturorë me përvojë në trashëgiminë kulturore dhe organizata të shoqërisë civile, që luajnë një rol kyç në promovimin e nismave kulturore të bazuara në komunitet.

Pjesëmarrësit do të njihen me këtë thirrje për propozime, kriteret e pranueshmërisë, procesin e dorëzimit të aplikimeve, vlerësimin si dhe informacion të përgjithshëm mbi projektin. Do të keni mundësi të dorëzoni aplikimin tuaj në përgjigje të kësaj thirrjeje.

Ju mirëpresim në Tiranë, Elbasan, Shkodër dhe Vlorë dhe online sipas kalendarit në vijim!